Dako nga employment opportunities ang pagbukas sang Regional Office sang Department of Environment and Natural Resources – Negros Island Region.
Sa interview sang Bombo Radyo Bacolod Engr. Joan Nathaniel Gerangaya, Assistant Regional Director for Technical Services sang DENR-NIR, 30 percent pa lamang ang nakuha nga mga posisyon sa regional office.
Ang nagaserbe nga officer in charge sang DENR-NIR amo si Forester Charlie Fabre, siya ang Assistant Regional Director for Technical Services, kag may-ara naman sang Assistant Regional Director for Administration.
Luwas sa DENR-NIR, may nabutang naman nga Regional Director para sa Environmental Management Bureau kag Mines and Geosciences Bureau.
May-ara naman sang mga officer in charge sa mga divisions kag sections sang regional office, apang temporary designation pa lamang.
Ini bangod ginahulat pa nga ma-aprubahan sang Department of Budget and Management ang plantella position nga pahanugutan sa departamento.
Suno diri, sila ang nagrequest sang 246 Regional positions, kag prayoridad sa promotions ang mga ginkuha na nga personnel gikan sa plantella sang mga Provincial ukon City Environment and Natural Resources Office (PENRO kag CENROs).
Kun ma-aprubahan na ang plantella position para sa DENR-NIR, ang mabakanti amo ang mga pwesto sa PENRO kag CENRO nga ginkuhaan.
Ginapanawagan naman nila nga madamo ang mag-apply indi lang gikan sa Negros Occidental kundi subong man sa Negros Oriental kag Siquijor agud patas ang employment opportunities sa Negros Island Region.
Sa karun, ang ila nga opisina ang yara anay sa daan nga Central Negros Electric Cooperative (CENECO) Office s a Talisay City.
Nagpropose naman ang mga ini sang budget sa pagtukod sang Regional Building kun sa diin magkaupod na ang DENR-NIR, Environmental Management Bureau kag Mines and Geosciences Bureau.
Kalakip sa ila mga kinahanglan ang may educational attainment bilang biologist, agriculturist, foresters, chemical engineers kag iban pa.
