Masobra 10,000 ka mga tawo ang ginalauman nga magabisita sa Handumanan Public Cemetery subong nga Tigkalalag.
Kahapon sang aga, personal nga nagbisita si Police Regional Director PBGen Rudecindo Reales kaupod si Bacolod City Police Office Director PCol Eugene Rebadomia sa Handumanan Public Cemetery.
Sa interview sang Bombo Radyo kay PCapt Leilani Lagoting, Station Commander sang Bacolod Police Station 10, may yara na sila ang ginpangpaskil nga dos and don’ts para sa awareness sang mga cemetery goers.
Suno kay Lagoting, may anum ka mga kapulisan nga magabantay sa sulod sang sementeryo.
Samtang sa gwa naman, may yara naman sang mga patrollers kag force mulitpliers kaupod ang Bureau of Fire Protection, Public Order and Safety Office (POSO), City Legal Office, kag mga Brgy Tanod.
Sa kabug-usan, 40 ka mga personnel ang gindeploy sa Handumanan Public Cemetery nga magabulig sa pagbantay sa seguridad subong nga UNDAS.
Samtang ginpahayag ni Lagoting nga kun may makumpiskar nga mga butang nga ginadumilian sa sulod sang patyo, ini ang isulod sa collection box kun sa diin diri ibutang ang tanan nga nakumpiskar kag indi na pwede nga bawion sang tag-iya.
Ginpasiguro naman ni Lagoting nga wala sang problema sa entrance kag exit sang sementeryo bangud may yara na sila sang linya.
Ginapangabay sini sa mga pumuluyo nga magkooperar sa mga kapulisan agud mangin matawhay kag malinong ang pagseleberar sang fiesta minatay.
