Amat-amat na nga nagadamo ang nagabisita sa Burgos Public Cemetery, duha ka adlaw antes ang Tigkalalag.
Sa interview sang Bombo Radyo kay Jr Conti, naga-ubra sang lapida, mas maayu man nga magpadulong sa patyo kun aga bangud madamo na sang tawo kun hapon.
Ginlauman naman sini nga sa Nobyembre 2 ang may pinakadamo nga magabisita sa sementeryo.
Si Conti ang nagapanglimpyo man sang pantyon kag nagabaligya sang kandila.
Suno kay Conti, P1,500 ang iya nga sukot sa pag-lettering sang mga lapida dala na ang pagpinta sang pantyon.
Suno diri, madamo ang nagapanglimyo kag nagapapinta sa iya sadto apang sa subong madutay na lamang bangud ginsirad-an na ang patyo.
Ginakasubo man sini nga may iban nga tawo nga manubo ang panan-awan sa ila nga nagatrabaho sa patyo.
Samtang, ginpahayag ni Conti nga kaangay nga napabay-an na ang Burgos Public Cemetery bangud ang iban nga patyon ang nagkalaguba na bangud sa mga madagko nga kahoy.
