Ginatun-an pa sang gobernador sang probinsya sang Negros Occidental kun magadeklarar sang state of calamity sa probinsya kasunod sang halit nga gintuga sang Bagyong Paeng.
Sa interview sang Bombo Radyo Bacolod kay Negros Occidental Governor Eugenio Jose “Bong” Lacson, santo sa breakdown nga ginhatag sang Office of the Provincial Agriculturist, ang halit sang bagyo sa crops nga ginalakipan sang humay kag utanon ang nagdangat sa P26 million.
14 ka mga local government units kag 81 ka mga barangay ang nahalitan kun sa diin 1219 ka mga mangunguma ang apektado kag 1132 ang total land area.
Suno kay Lacson, sa mga balay naman nga naguba bangud sa nasambit nga bagyo, nagdangat sa 157 ka mga balay ang apektado kun sa diin 36 ang totally damaged kag 126 ang partially damaged, ini ang narecord sa walo ka mga LGUs kag 27 ka barangays.
Samtang, nagdangat naman sa 8962 ka pamilya ukon 37,253 ka mga indibidwal ang naapektuhan sang Bagyong Paeng.
Apang suno sa gobernador ang mga apektado nga pumuluyo nga nagpabilin sa evacuation center ang ginabug-usan sang 2157 ka pamilya ukon 8251 ka indibidwal samtang ang iban nga mga apektado nga nagtinir sa tagsa ka himata ang nagdangat sa 5013 ka pamilya ukon 242287 ka indibidwal.
Suno sa gobernador may yara man sang reported nga kabug-usan nga 140 ka mga livestock nga naapektuhan sang bagyo kag P837,440 ang balor sang ginbilin nga kahalitan samtang P30,000 naman ang balor sang ginbilin nga kahalitan sa infrastructure sa bilog nga probinsya.
Ginalauman sang gobernador nga magpabilin sa 140 lang ka mga kasapatan sa bilog nga probinsya ang nahalitan sang bagyo.
Lantawon man ni Lacson kun ang mga rice farmers nga nahalitan sang bagyo sa probinsya ang insured ang farm sang mga ini.
Suno sa gobernador, mahimo nga ipadayon sang mga ini ang paghatag sa mga apektado nga mangunguma sang P2000 per hectare tubtob sa 3 hectares nga ginatalauma agud nga makaumpisa liwat sa pagtanum ang mga mangunguma.
Sa livestock naman, magapadayon sa paghatag sang baktin ang probinsya sa mga apektado nga swine raisers ilabi na ang yara sa backyard.
Gin-athag man sang gobernador nga ang ginahimo sa karun sang probinsya amo augmentation sa bulig nga ginahatag sang LGUs sa mga apektado nga residente.
Nagapadayon man sa karun ang assessment sang probinsya sa epekto sang Bagyong Paeng sa probinsya.
