Ginpangunahan ni Bacolod City Mayor Alfredo “Albee” Benitez ang selebrasyon sa ika-82 nga anibersaryo sang Araw ng Kagitingan sa Bacolod City Public Plaza kaina sang aga.
Ang programa ang nag-umpisa alas-7:00 sang aga, nga may tema “Beterano: Pagkilala sa katapatan baliktanaw sa sakripisyo at pag-alala ng kabayanihan”.
Ang programa ang gintambungan man sang mga veterans, mga kapulisan kag iban pa, kag sa aktibidad ginadumdom man ang mga nagtaliwan na nga mga baganihan sadtong World War II.
Sa mensahe ni Mayor Benitez, gin-athag sini nga sa Bataan Death March maathag nga mga Hapon ang kasumpong sang mga war veterans, apang ang kontra naman sa subong nga panahon ang indi natun makita.
Madamo naman sang mga baganihan nga yara lamang sa palibot nga nagabuhat sang bisan gamay lamang nga kamaayuhan kalakip na ang mga empleyado sang ciudad nga nagapaninlo sa palibot kag mga kapulisan nga nagaseguro sa kahilwayan sang mga pumuluyo.
Paathag sang alkalde nga indi kinahanglan nga mapatay agud mangin baganihan bangod ang paghatag sang bisan gamay lamang nga kontribusyon sa ciudad ang makabig na nga pagkabaganihan.
Ginpahanumdom sini ang iya singgitan humalin pa sang eleksyon, ang CHANGE.
Paathag sang alkalde nga tinutuyo sang mga ini nga bag-uhon ang sistema, bag-uhon ang kultura kag bag-uhon ang pamalakad sa ciudad.
Suno diri, ang ginpasar nga City Ordinance sa pagtukod sang “Be the change” program ang nagapanawagan sang behavioral change para sa tanan nga Bacolodnon.
Samtang ginpahayag man sang alkalde nga madayun na ang renovation sa Bacolod City Public Plaza subong nga tuig.
Ginalantaw ang posibilidad nga masuguran na ang programa sa bulan sang Disyembre.
