Ginpahayag sang Director sa Office of the Civil Defense Region 6 nga iduso nila nga madumili na ang pagpuyo sa sulod sang 4 km radius Permanent Danger Zone sang Bulkan Kanlaon.
Sa interview sang Bombo Radyo Bacolod kay OCD 6 Director Raul Fernandez, amat-amat na nga nagabalik sa ila nga mga balay ang mga evacuees, apang as of kahapon, may 833 ka pamilya ukon 2,832 ka indibidwal pa nga nagapabilin sa evacuation center sa banwa sang La Castellana.
Pasalig sini nga may nagakaigo nga food kag non-food supplies gikan sa nagkalainlain nga local government units kag mga ahensya sang gobyerno.
Padayun man ang pagsupply sang tubig sa lugar kag may mga nagpadala man sang mga water tankers kag mobile water purifiers kaangay sa ila agud makahatag sang bastante nga tubig sa mga evacuation centers kasubong man sa mga wala nag-evacuate.
Suno kay Fernandez wala pa sang pagbag-o sa aktibidad sang Bulkan Kanlaon, bangod mataas gihapon ang ginabuga sini nga sulfur dioxide kag may-ara gihapon sang swelling sa bulkan.
Ang emegency center kag incident command post sang OCD 6 ang nagapabilin man nga alerto.
Paathag sini nga sa banwa sang La Castellana na lamang may nabilin nga evacuees nga indi pa mapapauli samtang wala pa nagpanaog sa Alert Level 1 ang status sang bulkan.
Bilang long term plans, estoryahan pa nila sang nanarisari nga ahensya sa Region 6 kag mga local government units ang pagdumili sa pagpuyo sa sulod sang 4km radius Permanent Danger Zone.
Aminado ini nga indi masarangan sang LGUs nga concern ang pag-implementar kag ini ang magakinahanglan sang multi-agency kag whole government approach.
Pinaagi sini sila ang indi naman mabudlayan sa pag-evacuate sa mga residente inkaso nga mag-alburuto ang bulkan.
Paathag ni Fernandez nga tadlungon man nila ang Contingency Plan ilabi na para sa transition sa Negros Island Region.
