Gin-athag sang gobernador sang Negros Occidental nga padayon ang paggwa-sulod sang mga goods sa probinsya sa pihak sang community quarantine nga ginpatuman paagi sa executive order agud indi maglapta ang coronavirus disease 2019 (COVID-19).
Nahibaluan nga ginmando ni Governor Eugenio Jose Lacson ang pagsirado sa tanan nga borders, ports, kag airport sa probinsya bilang kabahin sang tikang nga ginahimo sang provincial government.
Nakasaad sa ginpapanaog nga Executive Order No. 20-15 series of 2020, sirado na ang mga border, pantalan kag paluparan sa probinsya effective immediately tubtob sa Abril 14, 2020.
Pahanugutan lamang nga makasulod amo ang duly identified residents sang Negros Occidental, its cities kag municipalities; health workers responding to emergency; mga miyembro sang PNP kag tanan nga branches sang AFP; mga persona nga may yara sang urgent medical ukon humanitarian reasons; kag mga persona nga magadul-ong sang essential goods, supplies kag medicines.
Ang tanan naman nga mga returning residents sang probinsya ang kinahanglan nga icheck kun may sintomas ini sang COVID.
Sa interview sang Bombo Radyo kay Lacson, gin-athag sini nga padayon ang pagtransport sang agricultural products nagikan sa Canlaon pakadto sa Libertad Market.
Nagalaom naman ini nga makahimo ang Vallacar Transit Incorporated sang stratehiya nga indi magtabok-tabok ang Ceres buses kundi kutob lang sa dulunan sang Negros Occidental kag Negros Oriental.
