Pabor ang provincial agriculturist sang Negros Occidental sa ginaplano nga bugas nalang ang ihatag sa mga benepisyaryo sang Pantawid Pamilyang Pilipino Program sa baylo nga rice subsidy.
Ini ang kasunod sang pahayag ni Agriculture Secretary William Dar nga ginaplanuhan sang DA kag sang Department of Social Welfare and Development nga bugas nalang ang ihatag sa 4Ps beneficiaries sa baylo nga hatagan sila sang 600 pesos nga rice subsidy.
Sa sini nga plano, magabakal ang DSWD sang humay sa local farmers paagi sa local government units agud ipanagtag sa mga nagabaton sang conditional cash transfer.
Sa interview sang Bombo Radyo kay Atty. Japhet Masculino, maayo ang ini nga tikang kun maplastar ang logistics bangud madamo ang benepisyaryo sang 4Ps kag madamo man ang humay nga mabakal sang gobyerno.
Sa sini nga paagi suno kay Masculino, mabuligan sang gobyerno ang mga mangunguma sa tunga-tunga sang pagsarurot sang presyo sang ila produkto.
Isa man ini ka paagi suno sa provincial agriculturist nga sigurado nga bugas gid ang matupa sa mga benepisyaryo sang 4Ps.
Nagalaom naman si Masculino nga magatupa ang ini nga plano kag indi lunsay hambal lamang bangud subong gid ang tiempo nga nagakinahanglan sang bulig ang mga mangunguma kasunod sang epekto sang Rice Tariffication Law.
