Ginpahayag sang tricycle driver sa Barangay Estefania, ciudad sang Bacolod nga indi lamang mga drayber ang gina-offeran nga kuhaan sang picture ang ila government ID kabaylo sang kwarta, apang may gina-offeran man sila nga iban.
Sa interview sang Bombo Radyo kay Joemarie Dioneo Osano, ang babayi nga may feature kaangay sang isa ka Chinese National ang may kaupod nga lalaki sa paglibot sa area.
Suno diri, ang makuhaan nila sang picture sang ID ang ila ginahatagan sang P100 kag pagkasunod nga adlaw, sila ang nagabalik para maghatag sang dugang nga P300.
Indi lamang ID ang ila ginakuhaan sang picture kundi ila man ginakuhaan sang litrato ang tawo nga nagapanag-iya sang ID.
Suno kay Osano, sa kada magpicture sila sang isa ka ID, lain-lain nga cellphone ang ila ginagamit nga ila ginasulod sa plastic.
Maga-conduct sang imbestigasyon ang National Bureau of Investigation (NBI) sa sa nasambitan nga insidente.
Suno kay NBI- Bacolod Executive Officer Atty Jose Gabriel Jr, nakabaton sila sang impormasyon nga sang Hunyo may babayi kag lalaki nga nagpalapit sa 13 ka mga tricycle drayber sa Barangay Estefania nga nag-ayo nga kuhaan sang picture ang ila driver’s license kag sila ang hatagan sang P400.
Suno pa diri, kun lantawon ang feature sang babayi, ini ang kaangay nga Chinese national apang nagahambal sang linggwahe nga Hiligaynon.
Suno kay Gabriel, ang concern diri amo nga posible nga maggamit ang personal data sang tawo para maghimo sang lain nga identity ukon mga peke nga dokyumento.
Panawagan ni Gabriel nga maghalong sa paghatag sang personal data sa mga tawo nga indi kilala.
