Wala natigayon ang pag-aresto kay Senator Ronald “Bato” dela Rosa kagab-i matapos ang nagluntad nga tensyon sa Senado natuhoy sa tinutuyo sang National Bureau of Investigation (NBI) nga iserbe ang arrest warrant naggikan sa International Criminal Court (ICC) batok sa senador.
Suno kay Senate President Alan Peter Cayetano, nagdesisyon ang NBI nga indi na pagdayunon ang pagdakop matapos nahibaluan ang opisyal nga panindugan sang Senado sa idalum sang Senate Resolution 44 kag ang mosyon ni Senador Rodante Marcoleta nga dapat anay ipadulong sa korte ang amo nga butang.
Una na nga nagkadto sa senado ang mga personnel sang NBI agud magserbe sang warrant batok kay dela Rosa may kaangtanan sa imbestigasyon sang ICC sa madugo nga war on drugs sa administrasyon ni Duterte.
Sa kuha sang CCTV nga ginpakita sa plenaryo, makit-an si dela Rosa nga nagadalagan padulong sa session hall samtang ginaalegar ginalagas sang mga nakasibilyan nga mga ahente sang NBI.
Bangud sini, nagboto ang mga senador nga i-hold in contempt ang pila ka mga NBI personnel kag ibutang sa kustodiya sang senado.
Nagpanawagan man si Cayetano sa mga ahensya sang gobyerno nga mag-agi anay sa korte ang kaso agud mapabilin ang due process kag legal remedies.
