Aminado ang punong barangay sang Barangay 8 sa syudad sang Bacolod nga madamo pa sang kuluhaon nga basura sa Mambuloc Creek.
Sa interview sang Bombo Radyo Bacolod kay Punong Barangay Juanna Magalona, sang Lunes pa gin-umpisahan sang City Disaster Risk Reduction Management Office (CDRMMO) sang Bacolod City ang pagkalkal sang basura gamit ang excavator sa creek kag ginabanta ni CDRRMO Bacolod City Head Jomarie Vargas nga tatlo pa ka semana antes matapos ang pagkuha sang mga basura sa creek.
Ginpahayag man ni Magalona nga ang mga pamalay nga gindemolish malapit sa creek ang nahatagan na sang notice to vacate sang City Legal Office sang Bacolod City.
Suno pa diri, nakabaton naman ang mga naapektuhan sang papeles nagikan sa Bacolod Housing Authority agud ipafollow up para sa ila relocation site.
Ginpahayag man sang punong barangay nga madugay na kuntani gindemolish ang mga balay kadungan sang ila barangay hall agud agyan sang excavator apang sini lang napatigayon.
Tinguhaan man sang Barangay 8 nga mahatagan sang assistance ang mga apektado nga suno kay Magalona lantawon nila ang sitwasyon kun magbaha pa kun matapos ang pagtinlo sang creek kag kun indi na, mahimo nga ang creek ang ginatunaan sang pagbaha.
Ang tubig sang creek ang nagaderecho sa dagat.
Samtang, gin-ayo man ni Magalona si CDRRMO Head Vargas nga mabutangan sang perimeter ang creek sa tion nga matapos nga ini matinluan.
