Isa sa ginalantaw nga rason sa pagpatigayon sang protesta sa Indonesia amo ang paglugdang sang ekonomiya sang pungsod kag tuman nga pagsaka sang presyo sang balaklon.
Sa interview sang Bombo Radyo kay Frair Acupan, Bombo International News Correspondent derekta sa Indonesia, sa karun nagatinir siya sa Surabaya City kag indi gid man tuman ka dako ang protesta didto bangod may yara sang peace agreement ang gobyerno kag kapulisan sa community leaders sang ciudad.
Apang suno diri, indi lamang sa Jakarta may ginapatigayon nga protesta kaangay na lamang sa Surabaya City nga may isa ka police station nga ginsunog bisan ini may historical relevance sa ciudad kag nagapadulong pa ang mga nagaprotesta sa opisina sang iban nga opisyal kag ginasunog nila ini.
Apang, sa pihak sini, nagapadala sang militar ang gobyerno sa kada subdivision agud magbantay.
Pahayag ni Acupan, magluwas nga nangin rason sa protesta ang pagkamatay sang food delivery rider kag pagpasaka sang monthly housing allowance sang mga mamalidha, ginalantaw man nga rason amo ang paglugdang sang ekonimiya sa kapin anum ka bulan na, pagsaka sang presyo sang mga balaklon, manubo nga sweldo sang mga mamumugon, kag paglakat ni Indonesian President Prabowo Subianto sa China apisar nga naghambal na ini nga ikansela niya ang iya trip apang wala niya man natuman.
Suno pa kay Acupan, kun ikumpara sini ang protesta sa Indonesia sa protesta sang Pilipinas, sobra-sobra na ang ginahimo sang Indonesian bangod gina-abisohan na sang Philippine Embassy ang mga Pilipino didto nga maglikaw sa area nga may protesta.
