Kadungan sang paglaom nga maaprubahan ang flag down rate sa taxi, hingyuon man sang taxi operators nga madugang nalang sang aprubado nga kantidad kag indi na pag-irecalibrate ang metrohan.
Kahapon, ginpahayag sang Philippine National Taxi Operators Association nga sila ang nagalaom nga matalupangdan man sang Land Transportation Franchising and Regulatory Board ang hingyo sang taxi operators kag drivers nga dugangan ang flag down rate sang P20 kadungan sang pahayag sang LTFRB nga tion na agud pasakaan ang pamasahe sa jeep.
Sa interview sang Bombo Radyo kay Mario Eusebio, presidente sang Taxi Operators in Negros Occidental, bentaha sa mga operator kag driver kun dugangan ang flag down rate bangud mahal ang presyo sang gasolina kag diesel.
Aminado ini nga makaintindi naman ang mga pasahero sa kamahal sang presyo sang produktong petrolyo gani sila ang nagalaom nga maaprubahan ang saka sa flag down rate.
Apang gin-ako sang TONO president nga isa sa ila nga mga concerns ang pagrecalibrate sang metrohan.
Kun maapprove ang saka sa flag down rate suno kay Eusebio, magaayo ang mga ini nga indi lang pag-ireprogram ang metrohan agud mahapos ang pagpanubo kun magbarato naman ang presyo sang produktong petrolyo.
Bentaha man ini para sa mga pasahero bangud madugang lang sila sang P10 ukon P20 depende sa maaprubahan kag wala na sang dugang nga bayad sa succeeding kilometers.
