Gin-deny sang Senate impeachment court ang pagpamatok sang kampo ni Vice President Sara Duterte natuhoy sa pagmarka sang isa ka bahin sang affidavit ni Arturo Lascañas bilang exhibit.
Si Lascañas ang nagpakilala bilang anay myembro sang Davao Death Squad (DDS).
Nag-object ang depensa kag nagpahayag nga ang affidavit ang wala nanotaryohan, indi pirmado, kag wala testigo nga nagpamatuod diri.
Apang suno kay Senate impeachment court presiding officer Sen. Francis “Chiz” Escudero, ang pagmarka bilang exhibit ang wala nagakahulugan nga ginapatihan sang korte nga kamatuoran ang kaundan sang affidavit ukon valid na ini nga ebidensya.
Suno diri, ginakilala lamang ang dokumento bilang kabahin sang record sa trial.
Dugang pa sang presiding officer, ang simple nga pagbalhin ukon pagmarka sang dokumento bilang exhibit amo isa ka teknikal ukon administratibo nga tikang lamang agud mangin organisado ang record sang korte.
Suno kay Escudero, indi man madulaan sang kinamatarong ang depensa bangud mahimo gihapon nga kwestyunon ukon pamatukan sang kampo ni Duterte kun pormal na ini nga ipresenta bilang ebidensya.
Ginpaathag naman ni Escudero nga mahimo lamang gamiton ang affidavit ni Lascañas para sa pagpamatuod nga gingamit ini sang National Bureau of Investigation (NBI) bilang isa ka open-source lead ukon impormasyon nga ila gin-usisa.
Ginpahayag man sini nga nagapabilin nga hearsay ang nasambit nga dokumento bilang unnotarized, indi pirmado, indi under oath ang pagsaysay, kag wala testigo nga nagpamatuod diri.
