Dako ang posibilidad nga may kaangtanan sa illegal nga druga ang ginalantaw nga motibo sa pagtiro-patay sa biktima sa shooting incident sa Purok Kingfisher, Barangay 16, Bacolod City sang Biyernes sang udto suno sa station commander sang Bacolod Police Station 1.
Ginkilala ang biktima kay Mark Christian John Lucenio alyas Badjao kag tumandok sang Barangay 35 apang nagakadto sa Purok Adarna bangud diri nagapuyo ang ikaduha niya nga misis.
Nagapungko si Lucenio sa passenger seat sang tricycle sang ini ang gintiro nga nagresulta sa iya gilayon nga kamatayon.
Sa interview sang Bombo Radyo Bacolod kay Police Major Ramel Sarona, station commander sang Bacolod Police Station 1, nagagwa sa imbestigasyon nga isa lamang ang suspek, nagasakay sa honda click nga motorsiklo ang suspek, nakafull face nga helmet, nakamask kag nakagloves kag ang exit ang yara sa Barangay 35.
Suno kay Sarona, ginasundan nila ang anggulo sang illegal nga druga bangud may nabaton man sila nga impormasyon nga may modus ang biktima nga nagabalikya sang illegal nga druga apang tawas kag snow bear nga dulsi ang ginahatag sini sa nagabakal.
Suno diri, nag-attempt man ang mga kapulisan nga patigayunan ini sang buybust operation apang indi man sang mga ini madakop bangud tawas ukon snowbear ang nakuha sa iya.
Santo pa sa impormasyon nga ila nabaton, ginbalikan pa ang biktima sadto sang nagbakal sa iya agud nga magreklamo nga indi ang ginbakal ang nabaton apang gin-akigan pa ini, gani nakabuya ini sang estorya nga balikan sini ang biktima.
Gina-aligar nga calibre 45 nga armas-luthang ang gingamit sa pagpatay sa biktima.
Nagapadayon man ang imbestigasyon sang mga kapulisan agud matumod ang motibo kag suspetsado sa kamatayon sang biktima.
Nagapanawagan man si Sarona, sa mga pumuluyo nga nakakita kag nakakilala sa suspek nga makig-angot lamang sa Bacolod Police Station 1.
