Ginasuportahan sang secretary general sang General Alliance of Workers Association (GAWA) ang pagpanawagan sang wage increase kadungan sang pagsaka sang rate sang inflation kag pagmahal sang mga balaklon ilabi na sang mga basic commodities.
Sa interview sang Bombo Radyo kay GAWA secretary general Wennie Sancho, makit-an gid ang tanan nga indikasyon nga kinahanglan sang wage increase para sa mga mamumugon sa pungsod.
Suno diri, nagadangat sa kapin 7.7 percent ang inflation rate, nagataas ang presyo sang mga balaklon kag naganubo ang purchasing power sang mga konsumedor kag mga trabahante.
Suno diri, may yara sang ruling Wage Order No. 26 ang National Wages and Productivity Commission (NWPC) nga nagtake effect sang Hunyo 5 kag santo sa layi, may yara sang isa ka tuig nga period nga indi matandog ang existing wage order magluwas lamang kun may supervening conditions.
Nagapati si Sancho nga sa sitwasyon sa karun, nagasolulubra ang supervening conditions bangud sa tuman nga pagsaka sa presyo sang gatong kag basic goods and services.
Nagikan sa iya eksperyensya, kun sila ang magafile sang petisyon para sa wage increase, sila ang hambalan nga igadeterminar pa kun may yara sang supervening coniditons apang maskin ang indi ekonomista, makakita gid sang indicators.
Suno sa iya, agud ini ang matilawan, dapat may yara sang maskin ano nga labor organization nga magafile sang petition para sa wage increase kag mas matahom pa kun may yara sang consolidated petition.
Ginapaabot naman sini nga magapamatok diri ang management kag igarason nga bag-o lamang nakarecover sa pandemic.
Suno sa iya, samtang ginatinguhaan nga mapasar ang petition, paabuton gid ang struggle para sa wage increase sang mga mamumugon.
Suhestiyon sini sa gobyerno nga maghatag anay sang subsidy sa mga workers tubtob nga sila ang maka-issue na sang wage increase.
