Natapos na ang pagpatigayon sang mga recognition ceremonies samtang subong naman nga adlaw ang umpisa sang end of school year rights sa tanan nga mga pampubliko nga eskwelahan.
Sa interview sang Bombo Radyo Bacolod kay Hernani Escullar Jr., public information officer sa Department of Education (DepEd) Region 6, nagadangat sa 164,003 ang maggradwar sa Grade 6 samtang 320,244 naman ang sa Grade 12 diri sa Western Visayas.
Samtang 136,609 ang sa moving up ceremonies sang Kindergarten kag 157,688 ang sa Grade 10.
Apang ini ang santo lamang sa enrollment record kag mahimo pa magbag-o ilabi na nga may mga estudyante nga kulang pa sa compliance kag may dapat pa nga tapuson.
Paathag ni Escullar nga dapat matapos na ang tanan nga end of school rights sa Biyernes, Mayo 31.
Ini bangod santo sa guidelines sang DepEd Central Office kag Malacañang, humalin Hunyo 1 tubtob 30, break na sang mga manunudlo kag sa nasambitan nga period sila ang indi pwede nga mahatagan sang trabaho.
Maresume na lamang ang mga aktibidad sa bulan sang Hulyo.
Sa pihak sini, magapadayun naman ang pagbalik sang mga non-teaching personnels kun kinahanglan kalakip na ang sa mga district kag regional offices.
Pasalig ni Escullar nga handa na ang DepEd Region 6 sa pagbukas sang School Year 2024-2025 kag ginahulat na lamang sang mga ini ang official guidelines halin sa DepEd Central Office.
Suno diri, maschedule na lamang sang Brigada Eskwela sa bulan sang Hulyo, samtang may personnel naman nga italana para magseguro sang katinlo sang mga eskwelahan sa break sang mga manunudlo.
