Ginpaathag sang public relations senior officer sang National Grid Corporation of the Philippines-Visayas (NGCP-Visayas) ang mga ginpatuman nga rotational brownouts.
Sa interview sang Bombo Radyo Bacolod kay Michelle Visera, ginpahanumdom sini nga may tatlo ka players sa power industry nga ginalakipan sang power generator, transmission, kag distribution.
Kun sa diin gikan sa generation plant, ang power supply ang nagalabay anay sa ila sa NGCP bilang transmission, antes makalab-ot sa mga electric cooperatives kaangay sang Negros Electric and Power Corporation (NEPC).
Ang NGCP amo ang naga-issue sang pagpatuman sang rotational brownouts bangod sila amo ang nagamonitor sa load ukon power supply kag kun ini ang bastante sa konsumo.
Sini lamang nga semana, may gin-issue naman nga yellow kag red alert ang NGCP.
Suno kay Visera, ang yellow alert ang nagakahulugan sang ‘warning’ nga malapit nalang kulangon ang supply.
Samtang ang red alert amo na ang mismo tion nga ginakulang na ang power supply kun ikumparar sa konsumo sang pumuluyo.
Diri na nagapatuman sang rotational brownout sang tig-tatlo ka oras, agud nga mabaki-baki ang mga apektado.
Apang kun nangin estable na ang power supply, ginabalik naman nila ang kuryente apisar nga wala pa natapos ang tatlo ka oras.
Suno kay Visera, indi lamang Negros Power, Negros Occidental Electric Cooperative (NOCECO), kag Northern Negros Electric Cooperative (NONECO) ang apektado sang rotational brownout bangod ini ang nagakatabo sa bilog nga Visayas kaangay sang Panay, Cebu, kag Bohol.
