Gin-alegar nga ginpunggan sang agent ni NBA superstar Lebron James ang potensyal nga paghampang kuntani sang ginakabig nga NBA King sa Golden State Warriors.
Una nga naglupok ang mga trade talk sa tunga sang Warriors kag Los Angeles Lakers sini nga off-season kaangot sa posible nga pagsaylo ni Lebron sa Warriors apang wala ini nadayon, sa baylo dalayon na nga nagpirma si Lebron sang contract extensions sa Lakers.
Santo sa bag-o nga report nga ginpagwa sang NBA, naghingyo ang sa karun nga agent ni Lebron nga si Rich Paul sa Lakers kag Warriors management nga indi na pagpadayunon ang trade talk.
Ginhimo ini ni Paul sa pihak sang nauna na nga pagestoryahanay sa tunga nanday Warriors owner Joe Lacob kag Lakers owner Jeanie Buss.
Panindugan ni Paul nga luyag sini nga maprotektahan si Lebron batok sa mga posible nga pagbatikos sa iya nga pagsaylo sang team, sa ikaapat ka beses sa iya bug-os nga Basketball career.
Madumduman nga anay player man sang Miami Heat kag Cleveland Cavaliers si Lebron James kun sa diin nangin ini ang nangin instrumento agud nga makapauli sang kampeonato ang duha ka team.
