Aminado ang Secretary General sa General Alliance of Workers Association (GAWA) nga maayo nga lihok ang pagpanubo sang edad sang makabig senior citizen sa 56 anyos, apang ginapanindugan sini nga dapat seguruhon anay nga 100 percent nga nagaka-implementar ang Senior Citizen’s Law.
Sa interview sang Bombo Radyo Bacolod kay Wennie Sancho, dapat unahon sang gobyerno ang pagseguro nga nagasunod ang mga business establishments sa pagpatuman sang senior citizen discount.
Bilang isa naman ka senior citizen, antes magdugang sang benepiyo una dapat nga matsekyar kun nagasunod na sa pagpatuman sang existing nga layi ang mga negosyo.
Suno diri, siya mismo ang makatestigo nga may-ara sang Chinese Drug Store sa ciudad sang Bacolod nga wala nagahatag sang discount sa bulong para sa mga senior citizens.
Madumduman nga santo sa layi, ang mga senior citizens ang dapat may-ara sang 20 percent discount sa bulong.
Dugang pa sini nga bisan sa toilet paper sa mga groceries, nga isa man sa kinahanglan sang senior citizens kag makabig nga basic needs, sila ang wala sang discount.
Pahanumdom sini nga dapat kun may ipasar nga layi, ini ang realistic nga mapatuman.
Paathag ni Sancho nga wala sang pulos ang pagpanubo sang age coverage sang Senior Citizen sa 56 anyos kun wala man ginahatag ang benepisyo nga nagakadapat para sa sektor.
