BACOLOD CITY — Apisar naintindihan sang Philippine Health Insurance Corporation ang nadangatan sang mga empleyado sang Bacolod Our Lady of Mercy Specialty Hospital, gin-athag sang korporasyon nga desisyon sang ospital ang closure.
Sa interview sang Bombo Radyo kay PhilHealth Region 6 vice president Lourdes Diocson, ginpahayag sini nga convicted sa duha ka mga kaso sa korte ang naga-manage sa ospital kag indi ang final and executory.
Magluwas diri, may bayolasyon man ini sa korporasyon bangud sa adding of claims kag misrepresentation sa claims sang cataract patients kag madamo nga iban pa nga mga reklamo.
Ini ang nakomiter sang una nga tag-iya nga Chiong Bi Incorporated apang santo sa performance commitment nga ginpirmahan, abagahon gihapon sang Negros Health Care Management System Incorporated ang sala sang una nga ownership.
Suno kay Diocson, nag-appeal ang NHCMSI sa accreditation committee nga ginalakipan sang Philippine Medical Association, Philippine Health Association kag Department of Health apang gin-apinan sini gihapon ang denial sang accreditation sub-committee sa regional office rason nga nabasura ang motion for reconsideration.
Suno sa regional vice president, sarang gihapon nga maka-operate ang ospital bangud may yara ini sang license to operate halin sa Department of Health kag indi mandu sang PhilHealth ang closure.
