Ginapakamaayo sang abogado nga ginsulat lamang kag wala na ginwaragway ni Alice Guo sa pag-atubang sini sa Senate Hearing ang pangalan sang nagbulig sa ila nga makapalagyo.
Sa interview sang Bombo Radyo Bacolod kay Atty Jomax Ortiz, kun ginsugid ni dismissed Bamban, Tarlac Mayor Alice Guo ang pangalan sang nagbulig sa ila sa public hearing, mahimo nga makilal-an sang mga yara sa sindikato kag mabutang sa risgo.
Kalakip man ang mabutang sa alang-alang ang iya mga ginikanan nga yara sa China kasubong man sa iya utod nga si Wesley Guo nga tubtob sa karun wala pa makit-an.
Paathag ni Ortiz nga mas maayo kuntani kun executive session na lamang ang ginpatigayon, bangod sa public hearing malauman nga indi na magatuad ang anay alkalde.
Sa baylo ini ang mangin grand standing na lamang kag wala man sang mahimo nga solusyon.
Dugang pa ni Ortiz nga sa kadakuon sang involved, indi lamang ang seguridad sang pamilya ni Guo nga mabutang sa risgo, kalakip na ang seguridad sang gobyerno.
Nagapati ini nga nakabatun na sang abiso gikan sa iya abogado si Guo gani siya ang indi mapasabat.
Apang pahayag ni Ortiz nga dapat manabat man sa layi kun may conspirator nga amo ang nagahatag sang script kay Guo.
Aminado man ang abogado nga mapatawag lamang sa Senate hearing si Guo apisar nga may kaso nga misrepresentation sa korte bangod tuman ka gamay sang iya nga kaso kag may ara lamang ginarekomendar nga bail bond.
Mangin mabug-at na lamang ang kaso kun mapamatud-an ang involvement sini sa kaso sang torture, pagpagtay kag iban pa nga ginkomiter sa sulod sang POGOs.
Nagapati si Ortiz nga ang Chinese Government ang nagahulag sang patago kag ini ang kalakip lamang sa ila plano nga madominar ang global economy.
Ang kahangawa sa iya safety man ang nagduso kay Alice Guo kun ngaa ini ang nakabullet proof vest sa pagtambong sa Senate hearing.
