Pagtimalos ang ginalantaw nga motibo sa shooting incident nga nagluntad sa Sitio Hilis, Purok 17, Barangay Inayawan, Cauayan, Negros Occidental sang Abril 28 sang gab-i.
Sa interview sang Bombo Radyo Bacolod kay Police Lt. Col Lowell Garinganao, hepe sang Cauayan Municipal Police Station, sang Abril 28 sang gab-i nagluntad ang isa pa ka shooting incident kun sa diin ang biktima amo si John Desendario, 39 anyos kag residente sang nasambit nga lugar.
Suno kay Garinganao, wala pa matumod sa karun ang suspetsado sa nasambit nga shooting incident apang may yara na sila nga persons of interest.
Suno sa hepe, nagpamiyesta ang biktima sa nasambit nga Purok kun sa diin nagpangihi siya kag nakabati sang lupok kag nakibot ini nga siya na ang gintiro.
Nakaagom ini sang igo sa natuo nga bahin sang iya nga likod kag padayun nga ginabulong sa ospital.
Narecover sa crime scene ang basiyo sang caliber .45.
Wala man sang nakaaway ang biktima apang ila nga ginalantaw nga anggulo kag motibo sa pagtiro sa biktima amo ang nakaligad sini nga kaso nga pagpamuno sang 2016.
Nadakpan si Desendario paagi sa warrant of arrest sang 2022.
Dugang pa sa anggulo amo nga gintarget man ini bangud man sa mga hinumuan sini sa nasambit nga barangay.
Sa karon nagapadayon pa ang imbestigasyon sang kapulisan sa insidente.
