Ginpahayag ni ACT Teachers Partylist Representative Franz Castro nga yara na sa kamot ni President Ferdinand “Bongbong” Marcos Jr, kun ipabilin pa sini bilang Education Secretary si Vice President Sara Duterte.
Sa interview sang Bombo Radyo Bacolod kay House Deputy Minority Leader Franz Castro, indi nagid matago ang pagsipak sang UNITEAM.
Suno diri, ang makita nga pagbunggu-anay sang kampo sang Duterte kag Marcos ang nagapakita nga dis-united na ang Uniteam.
Nakita man sini nga madamo sang mga isyu nga magkatuhay ang opinyon ni Presidente Marcos kag Vice President Duterte partikular na sa Charter Change, kasubong man sa isyu sa West Philippine Sea, kun sa diin nagapabilin nga nagahipos ang Bise Presidente.
Paathag ni Castro nga prerogative sang Presidente ang pagbutang sang gabinete, gani sa tion nga makita ni Presidente Marcos nga wala na nagakaigo sa pwesto bilang tiglikom sa Department of Education (DepEd) mahimo sini nga marevoke ang appointment.
Sa pihak nga bahin, nahangpan man ni Castro ang hibubun-ot ni First Lady Liza Araneta Marcos kay Vice President Duterte bangod sa pagtambong sini sa prayer rally nga nagacritize sa Presidente.
Apang pahanumdom sang mamalidha nga ini ang tubtob lamang sa iya kinamatarong bilang asawa, kag indi na dapat magpasilabot pa sa politika.
Suno kay Castro, ang panawagan sang First Lady nga magpahalin bilang DepEd Secretary kay VP Sara, ang nagapakita lamang nga ini ang may pangamot sa appointment sang pila ka mga cabinet members.
Aminado ang kongresista nga umpisa pa lamang, panawagan na sang ACT Teachers Partylist nga educator ang magpungko nga Education Secretary bangod ang mga ini ang mas nakahibalo sa matuod nga sitwasyon kag problema sa sektor.
Ilabi na karun nga may education crisis, learning losses kag tuman ka nubo ang performance sa International assessment.
Panawagan sang mga ini nga dapat ang mas competent ang ibutang bilang tiglikom sa Department of Education.
