Gamay na lamang kag marehistro na ang ginatukod nga kooperatiba sang pila ka mga transport group sa ciudad sang Bacolod bilang una nga tikang sa pagsulod sa public utility vehicle (PUV) modernization program.
Sa interview sang Bombo Radyo Bacolod kay Albert Villanueva, chairman of the Sentrong Samahan ng Tsuper at Operators (SSTONE), last requirement na lamang sa ila amo ang matipon ang mga dokumento sang mga miyembro nga magasulod sa kooperatiba.
Paathag sini nga ini ang first phase pa lamang sang PUV modernization program kag ang ila nga tinutuyo amo nga mapahanugutan lamang nga makabyahe sa Mayo 1.
Ini bangod ginalauman na nila nga indi nagid mahatagan sang extension ang provisional authority sang mga unconsolidated traditional jeepney nga maga-expire na sa Abril 30.
Apang ang mga magasulod sa consolidation ang ginapahayag nga sarang pa nga makabyahe sang traditional jeepney unit sa sulod sang tatlo tubtob apat ka tuig.
Ginapasalamatan man sang mga ini si Bacolod City Mayor Alfredo “Albee” Benitez nga nagbulig agud madayun ang pagtukod nila sang kaugalingon nga kooperatiba bangod indi nila luyag magrisgo sa pagsulod sa mga existing nga kooperatiba kag korporasyon.
Panindugan ni Villanueva nga indi solusyon sa problema ang rally-protesta kag ini ang wala gid sang epekto.
