Aminado ang punong barangay sang Barangay Granada sa syudad sang Bacolod nga ginpreparahan nila ang liwat nga pagpasakop sa Street Dance and Arena Competition sang Masskara Festival subong nga tuig kun sa diin wala man sila napaslawan matapos nga nangin grand champion kag nakakuha pa sang pila ka special awards.
Sa interview sang Bombo Radyo Bacolod kay Punong Barangay Alfredo Talimudao, may hang-over pa sila sa kakapoy kasunod sang ila pagpreparar para sa pagperform sa Street Dance and Arena Competition kahapon.
Suno kay Talimudao, ang premyo nga ila nakuha kun lantawon ang indi makabayad sa ila gingasto samtang nagapreparar para sa adlaw sang competition apang ang nabatyagan nga kalipay kag bugal bangud sa kadalag-an ang indi man mabayaran sang kwarta.\
Suno diri, tuman man ang ila kalipay bangud matapos nga nag-grand slam sila sang 2014 tubtob 2016 nagpahuway kag sa karun liwat nga nagpasakop kun sa diin nagbunga man ang tanan nga sakripisyo kag pangabudlay.
Suno kay Talimudao, nakuha man nila ang choice award; most discipline kag best in music.
Aminado man ini nga gindisplina gid sini ang team nila kun sa diin ginpaidalom sa training kag work shops.
Wala man sini ginapasugtan ang mga dancers kag props men nga maglagaw kag maginum-ianum samtang nagapreparar sang ila performance agud nga mangin maayo ang resulta.
Ginpahayag man sini nga sa tunga-tunga sang bulan sang Agosto nag-audition sila sang ila dancers bangud nabudlayan na sila magkuha sang ila daan nga dancers bangud ang iban may trabaho kag ang iban ang pamilyado na.
Kabug-usan nga 190 ang kabahin sang team sang Barangay Granada nga nagperform sa street dance and arena competition.
Aminado man ini nga may yara man sila sang kabudlayan sa pagpangita sang gamiton para sa costumes bangud ang iban ang ginbakal pa sa Manila kag gin-order pa sa China samtang ang iban ang nakuha sa Cebu kag Iloilo bangud wala sang makita sa syudad.
Meetingan pa sang council sang Barangay Granada ang pagtunga sang ila nadag-an nga P1 Million nga cash prize.
