BACOLOD CITY — Makaligad ang isa ka tuig kag anom ka bulan, nahatagan na sang hustisya ang kamatayon sang Negrense nga OFW sa Dubai nga ginbuno-buno-patay sadtong Pebrero 2016.
Sa madumduman nga nag-agom sang 66 tanan nga buno gamit ang sundang kag screw driver ang biktima nga si Maria Lenlie Oliverio, tumandok sang Barangay Guiljungan, banwa sang Cauayan kag ginatudlo nga suspetsado amo ang Pakistani nga caretaker sang apartment nga ginadayunan sang biktima nga ginkilala kay alias Kurshed.
Sa panuaron sang suspetsado, nagapanglimpyo ini sa building sang mag-ayo ang Pinay nga magaguwa apang nagbais ini bangud mahimo magbalik ang higku apang nagpamilit si Oliverio.
Pagkaligad sang pila ka oras, ginbalikan ni Korshed ang unit ni Oliverio kag nagpakuno-kuno nga kay-uhon ang alarm system apang nagpamalibad ang biktima.
Pilit nga nagsulod ang Pakistani kag ginbuno-buno ang biktima kag antes magbiya, ginkawatan pa sini ang apartment.
Sa ulihi nga hearing sang tinalikdan nga Agusto 7, 2016, ginpabutyag ni Kurshed nga wala sin ginhungod ang pagpatay sa biktima.
Ang korte sa Dubai nagpamatbat kay Kurshed sang 27 katuig nga pagkabilanggo, kun sa diin 25 katuig diri ang para sa kaso nga pagpatay samtang ang duha katuig ang bangud sa pagpangawat sini sa apartment sang biktima.
Matapos maserbisyuhan ang 27 katuig nga pagka-priso, igapa-deport si Kurshed paguwa sa Dubai.
Ginatinguhaan sang Bombo Radyo nga makuhaan sang pahayag ang pamilya Oliverio apang sa inisyal nga pag-istorya, indi kontento ang mga ini sa pamatbat sang korte.
