Gindayaw sang iya kaangay nga mga beauty queens si Philippine bet, Tracy Maureen Perez bangud sa pagrepresentar sang pungsod sa Miss World 2021 pageant kun sa diin nagtapos ini sa Top 12.
Nagbilin sang komento si Emmanuelle Vera, Reina Hispanoamericana 2021 third runner-up, sa isa sa mga post ni Tracy sa Instagram nga nagasuksok sang gown para sa coronation night sang nasambit nga pageant.
Gincongratulate ni Vera si Tracy kag ginpahayag nga nangin amazing ang iya performance.
Ginpabutyag naman ni Binibining Pilipinas International 2021 Hannah Arnold ang iya pagpalangga sa beauty queen paagi man sa komento kag ginhambalan nga proud siya diri.
Nagbilin man sang komento si Miss World 2013 Megan Young kag Miss Supranational Philippines 2021 Dindi Pajares nga ginapabugal nila si Tracy.
Gincongratulate naman sang Miss World Organization ang Philippine bet kag ginpahayag nga iya narepresentar sang maayo ang pungsod.
Ginpasalamatan ini sang organisasyon sa pagrepresentar sang Pilipinas kag sa tanan nga single mothers.
Gintawag sang Miss World Philippines Organization si Tracy nga #ExceptionallyEmpoweredFilipina.
Ang 70th edition sang Miss World ang nakuha ni Karolina Bielawska sang Poland sa Puerto Rico.
