Lauman subong nga adlaw ang pag-abot sang pamilya sang lalaki nga foreign national nga nalakip sa 19 ka gina-alegar nga miyembro sang New People’s Army nga napatay sa engkwentro sa Toboso, Negros Occidental.
Sa interview sang Bombo Radyo kay Pastor Rev. Moreto Panadero, nagapanag-iya sang Shekainah Funeral Services sa ciudad sang Escalante, siyam ka bangkay ang gindala sa iya punerarya samtang ang 10 ka bangkay naman ang yara sa punerarya sa Toboso.
Suno diri, sa siyam ka bangkay nga yara sa ciudad, lima ang na-identify na samtang ang apat naman ang indi na makilal-an bangod bloated na ang bangkay.
Suno kay Panadero, may isa nga kumpirmado nga foreign national bangod nakig-angot na ang pamilya sini nga yara sa luwas sang pungsod kag mismo ang asawa sini ang nagkumpirmar sa iya identity.
Nag-ayo ang pamilya nga hatagan ini sang presentable nga lungon kag ginalauman nga maga-abot na subong nga adlaw ang pamilya sini.
Dugang pa ni Panadero may isa pa gid nga kaangay nga foreign national man nga lalaki apang indi pa sini makumpirmar tubtob nga wala pa sang identity.
Samtang, naclaim na sang pamilya ang bangkay ni Maria Clarita Branzuel Blanco nga isa ka manunudlo gikan sa Tabugon, Cebu kag ang bangkay ni Errol Wendel Chen nga residente sang Makati City.
Antes ginbyahe ang mga bangkay, may ginhalad nga pagpangmuyo si Pastor Rev. Moreto Panadero para sa mga napatay.
