Ang immediate family ni Police Lt. Col. Verbo ang mapasaka sang kaso batok sa driver sang dump truck nga nagbunggo sa ila sa Barangay Rizal, San Carlos City kahapon sang hapon kun sa diin napatay ang hepe sang Guihulngan City Police Station.
Suno kay Police Lt. Roby Aurita, deputy chief sang San Carlos City Police Station, 18 oras ang reglementary period of detention para kay Wenny Boy Nagor, 24 anyos kag residente sang Barangay Kumaliskis, Salvador Benedicto.
Sa inisyal nga pag-usisa kay Nagor, wala nagkagat ang preno gani bisan gintinguhaan pa niya nga indi malaksam ang pihak nga lane, wala na nakontrol ang truck kag natumba sa likuon nga dalan.
Ang dump truck karga nga nagakarga sang graba ang nagikan sa Salvador Benedicto kag padulhog na sa San Carlos.
Suno sa driver, pito na siya ka tuig nga nagamaneho sang nagkalain-lain nga truck kag familiar man ini sa lugar apang natabo ang aksidente kahapon.
Kagab-i, gintinguhaan nga mapahigad ang truck apang wala pa napabangon.
Nagpanawagan man si Aurita sa tanan nga mga motorista nga maghalong gid kun maglabay sa lugar nga indi sunado ukon indi matapan.
Nagakadapat man suno kay Aurita nga siguruhon ang kondisyon sang salakyan antes magbyahe agud malikawan ang disgrasya.
