Ligom dulom sa gihapon ang imbestigasyon sang mga kapulisan kag sang National Bureau of Investigation may angot sa pag-abduct kay retired Police Major Lito Pirote sa isa ka hotel sa syudad sang Bacolod sadtong Abril 19 subong nga tuig.
Ini ang nangin pahayag sang bata sang biktima nga si Cate Pirote sa gin-patigayon nga press conference sadtong Hunyo 12.
Suno sa iya, wala na sila sang may nabaton nga tawag nahungod sa imbestigasyon sang mga kapulisan sa pag-abduct sa ila amay.
Kada semana naman naga-koordinar sila sa NBI kag sa BCPO apang wala sila sang may nabaton nga ano man nga resulta kag sabat kag bangud sini, naga-apelar sila sa mga otoridad nga kuntani indi pagpabay-an ang kaso sang ila amay.
Ginpahayag man sini nga sa pinaka-ulihi nga paghinun-anon nila sa mga kapulisan, nag-saad sa ila ang mga otoridad nga magatukod sang task group nga amo ang magahulag sa pag-pangita sa ila padre de pamilya apang suno kay Pirote, paano nila mapatihan kun may yara gid man sang grupo nga gintukod ang kapulisan kun tubtob subong wala sa gihapon sang resulta ang kaso.
Makapila naman ka beses nga nakatawag si Pirote kay BCPO Director Police Colonel Henry Biñas, apang wala siya ginasabat.
Samtang gin-kwestiyon naman sang pamilya ang pagtugyan sang Bacolod City Police Office sang kaso sa pag-abduct sa ila amay sa isa ka Police Senior Master Sergeant.
Suno sa bata sang biktima, wala man nila gina-pakanubo ang ranggo sang imbestigador nga nagakapot sang kaso sang ila amay, apang suno sa iya, dapat may yara gid sang opisyal nga nagabulig sa imbestigador sang Police Station 2 nga amo ang gintugyanan sa kaso sang iya amay.
Samtang ginsabat ni Police Colonel Henry Biñas, city director sang Bacolod City Police Office ang pahayag ni Pirote nga ang gintugyanan nga imbestigador sa Police Station 2 amo ang una nga nag-responder sang natabo ang abduction sa ila padre de pamilya sa Metro Inn Bacolod sadtong Abril 19, rason nga siya ang gin-pahulag agud makatipon sang ebidensya.
Magluwas sa imbestigador sang Police Station 2 suno kay Biñas, may yara man sang personnel gikan sa Criminal Investigation and Detection Group (CDIG) kag Investigation and Detection Management Unit (IDMU) nga nagabulig imbestigar sa kaso kag sa pag-pangita sa ila amay.
Gin-athag man sang city director nga wala ginapabay-an sang mga kapulisan ang kaso sa pag-abduct sa ila amay.
Gina-inchindi naman ni Biñas ang sentimento sang pamilya Pirote, apang ginatinguhaan man nila nga mga kapulisan ilabi na sang Police Station 2 sa pag-pamuno ni Police Captain Leo Estopa ang tanan agud mahibaluan na ang lokasyon sang iya amay kag madakpan kun sin-o ang sa likod sa natabo nga abduction.
Ang ini nga kaso suno sa iya ang indi madali-dali resolbahon ilabi na nga naangot sa iligal nga aktibidad partikular na sa droga ang biktima.
Gin-ako man ni Biñas nga wala siya nakabalos sang siya ang ginkontak sang pamilya ni Pirote bangud yara siya sa isa ka workshop.
Ginpahayag man sini nga kun indi siya makabalos sa mga tawag ukon text gikan sa mga himata, mahimo naman nila makontak ang hepe sang Police Station 2 nga si Police Capt. Estopa kag ang imbestigador nga nagakapot sang kaso.
Nabudlayan man ang mga kapulisan suno sa director bangud limitado lang ang ginahatag sang pamilya ni Pirote kun sin-o ang mga tawo nga naupod sini sadtong yara pa siya sa serbisyo.
Sa pihak sini, nag-pasalig sa gihapon ni Biñas sa pamilya sang biktima nga ila gid himuon ang tanan agud makit-an na kag mahibaluan kun ano ang sitwasyon sang anay police.
Apang naghingyo naman ini nga hatagan pa gid sila sang oras sa pagtipon sang mga ebidensya bangud indi lang sa syudad sang Bacolod naangot sa iligal nga aktibidad ang ila amay kundi sa iban pa nga mga lugar.
Ginkumpirmar man ni Biñas nga siya ang “full-fledged” City Director na sang Bacolod City Police Office epektibo sadtong bulan sang Mayo matapos siya ang ginpili ni Mayor Evelio “Bing” Leonardia.
Date of airing: June 13 (Bombo News and Views Morning Edition)
