Nagpatigayon sang panelling operations ang Regional Explosive and Ordnance Disposal and Canine Unit sa mga sporting venues antes ang pagsugod sang 2026 National Private Schools Athletic Association Meet (PRISAA 2026).
Sa interview sang Bombo Radyo Bacolod kay Police Captain Jester Minguez, assistant chief sang Regional EOD and Canine Unit sang Police Regional Office – Negros Island Region, walo ka mga personnel ang nagpatigayon sang panelling sa nagkalainlain nga sporting venues partikular na sa Panaad Park and Stadium.
Duha naman ka explosive detection dogs ang ila nga gingamit gikan sa Bacolod City Police Office kag Negros Occidental Police Provincial Office.
Apang bangod duha ka oras lang ang panelling duration sang mga ido, ang mga ini ang gindeploy lang sa mga critical areas ukon sa mga lugar nga madamo sang nagalabay, samtang ang mga personnel na lamang ang nagtsekyar sa iban nga areas.
Wala naman nadala sa ginpanelling ang mga billeting schools bangod may-ara naman nga assigned nga safety officers.
Bangod bilog nga Negros Occidental ang ila nga sakop kalakip ang Bacolod City, wala na sila nagbutang sang standby personnel sa Panaad Park and Stadium, sa baylo sila ang oncall na lamang.
Panugyan ni Minguez nga kun may matalupangdan nga makaduluda nga package, items ukon bags, ipahibalo sa kapulisan, kag ang mga police personnel na ang magacontact sa ila.
