Dako ang pagpasalamat sang Silay Para Chess player matapos nga siya ang isa sa nakaangkon sa pinakamadamo nga medalye sa mga atleta sang Pilipinas nga naghampang sa bag-o lang natapos nga 11th ASEAN Para-Games 2022 sa Indonesia.
Si Sander Severino ang nakaangkon sang apat ka gold kag duha ka silver medal gikan sa individual kag team category sang chess.
Si Severino ang indi makalakat kag nagasalig lang sa wheelchair sa iya pagbyahe.
Paathag sini nga masobra 100 ang mga atleta sang Pilipinas nga ginpadala sa ASEAN Para-Games.
Ginapasalamat sini sa Ginoo ang ginhatag nga talento kag pinaagi sini siya ang nakahatag sang dungog para sa pungsod kag maka-inspire pa sang iban nga mga persons with disability (PWD) nga may handom sa sports.
Ginpakigbahin sini nga napukaw ang iya nga kuryusidad sa chess bangod ang amay sini ang masami nga nagahampang nga nagadangat sa kaagahon.
Nag-umpisa man ini nga maghampang sa kaingod balay apang masami nga nagakapierde gani mas na-engganyo ini nga magpatudlo sa iya nga amay.
Siya ang nag-umpisa sa edad nga 5 tubtob 6 anyos kun sa diin sang siya ang 10 ka tuig nahimo na sini nga makahampang sa Palarong Pambansa.
Nagapati si Severino nga nangin madasig ang iya nga progress bangod palangga sini ang chess gani ginhatagan niya gid ini sang focus kag tiyempo.
Naangkon sini ang titulo bilang PD Master sa Intercontinental competition sa Bataan sang siya ang highschool.
Apang bangod kinahanglan nga makadaog sang numero sang international competition ang isa ka chess player agud mangin International Master, siya ang nadulaan sang paglaom bangod wala ini sang ikasarang sa pagbyahe padulong sa International stage.
Aminado ini nga siya ang libre sa pagbyahe bangod ginarepresentar sini ang Pilipinas apang kinahanglan sini magbyahe upod ang amay kag ini ang wala nalakip sa sponsored sadto.
Bangod sa indi ikasarang nga maghampang sa mga international competitions bangod sa kakulang sang suporta, gani nadulaan ini sang paglaom kag nag-untat sa sulod sang lima ka tuig.
Nagbalik ini sa paghampang sang 2005 matapos nga siya ang ginrecruit agud maghampang sa ASEAN Paralympics.
Suno kay Severino, sa karun siya ang nagapabilin pa nga yara sa PD Master kag kasunod na sini ang International Master kag Grand Master nga titulo.
Ginpakigbahin man sini nga sang 2005, nakadepende lang sa Philippine Olympic Committee ang allowances sang mga atleta apang sang 2015, pinaagi sa sulat sang Philippine Association for Differently Abled gani sila ang ginakilala na bilang mga National Athletes.
Bangod sini, mas nangin maayo naman ang ila akomodasyon samtang ang amay sini ang wala naman nagaproblema sa gastos sa pagbyahe abroad matapos nga ini ang gin-absorb bilang assistant coach sa Philippine Team.
Suno diri, pinaagi sa ila nga achievements, mas mapanugyan pa nila sa mga pamatan-on nga mag-engage sa sports bangod ini ang madamo sang mabulig sa ila partikular na sa mga scholarship sa eskwelahan.
