Ginpulawan sa patyo sang isa ka pamilya sa banwa sang Valladolid ang ila himata nga ginpalubong gilayon sang Valladolid District Hospital bangud ginapatihan nga suspected COVID patient.
Sa exclusive interview sang Bombo Radyo Bacolod kay Jesselle Jambaro, hinablos sang napatay nga si Ruben Jambaro Jr., 54-anyos, ginpahayag sini nga mga alas-11:00 kahapon sang udto masadya pa sila nga nagakaon-kaon apang pagsulod sang iya tiyo sa ila balay kag nagpungko, hinali nalang nga nagpin-ot ang dughan sini kag nag-ayo nga mapadala sa ospital.
Pag-abot sa ospital, ginbutang ini dayon sa COVID area apang bangud nga indi masarangan, gina-refer ini sa ospital sa Bacolod.
Nagaayo ang pamilya Jambaro nga hatagan sila sang referral para sa public hospital sa Bacolod apang ginatanyagan lamang sila ni Dra. Ea sang referral form para sa mga pribado nga ospital.
Bangud nga wala gid maghatag sang referral ang doktora, ginbawian sang kabuhi ang biktima alas-5:30 sang hapon.// Ginapahayag nga stroke ang ginkamatay sang biktima.
Pagdeklarar nga patay na, ginhambalan ang pamilya Jambaro nga kinahanglan nga ilubong dayon ang bangkay santo sa protocol.
Apang nag-ayo si Jesselle nga pahibaluon sini anay ang ila pamilya kag hulaton nga makit-an sang mga himata ang iya nga tiyo.
Apang ila nalang ginkakibot nga gindala na sa patyo ang bangkay ni Ruben.
Maayo lang suno sa iya nga ila naabtan bangud nga siraduhan na kuntani ang pantyon.
Bangud sini, nagpulaw halin alas-7:00 kagab-i ang pamilya agud nga bantayan nga indi pagsiraduhan ang pantyon.
Magahulat naman sila sang resulta sang swab test sang iya tiyo agud mahibaluan kun positibo ini sa COVID ukon indi…
Samtang, magasapol naman ang local IATF sang Valladolid agud hambalan kun ano nga tikang ang ila pagahimuon sa amo nga isyu.
Suno kay Mayor Enrique “Bebot” Miravalles, mahulat sila anay sang record nagikan sa ospital kag lantawon kun ano ang ginkamatay sang biktima agud makadihon sila sang desisyon.
Nagapakig-unong man sila sa pamilya Jambaro bangud sa natabo.
Samtang, ginkumpirmar man ni Miravalles nga ang LGU ang nagpa-obra sang lulubngan para sa mga COVID suspected patients.
