Ginhangkat ni President Ferdinand Marcos Jr. si Chinese Premier Li Qiang natuhoy sa mga clashes sa West Philippine Sea sa regional summit talks sang Huwebes samtang nagasaka ang kahangawa nga posible nga mag-erupt ang konflikto sa ginaagawan nga baybayon.
Si Li ang nakigkita sa mga pinuno sang 10-member Association of Southeast Asian Nations (ASEAN) sa isa ka pagtililipon sa Laos matapos ang isa ka adlaw nga diskusyon nga gindominate sang Myanmar civil war.
Suno sa isa ka Southeast Asian diplomat, ginpalab-ot ni Marcos ang issue kay Li kag ginpahayag nga indi sarang maseparar ang economic cooperation nagikan sa political security.
Apang ginpahayag ni Marcos sa meeting nga indi makapakuno-kuno ang China nga maayo ang tanan sa economic front kun may yara sang tensions sa political front.
Suno pa sa iya, dapat istoryahan sang duha ka bahin ang natuhoy sa code of conduct sa baybayon.
