Nagapati si Presidente Ferdinand Marcos Jr. nga indi gilayon mabatyagan ang epekto sang oil price hike bangud may proseso pa antes ini makaapekto sa presyo sang mga balaklon.
Suno diri, posible nga magsaka ang presyo sang iban nga consumer goods bangud sa ginalauman nga pagsaka sang presyo sang produktong petrolyo kag pagdelay sang global supply chain, apang nagadepende man ini kun ano kadugay ang krisis.
Pahayag sang Presidente, sa karon padayon ang byahe sang mga barko nga may dala sang produkto padulong sa pungsod.
Nagalaum ang presidente nga matapos gilayon ang krisis antes pa mabatyagan sang mga consumer ang pagsaka sang presyo sang mga balaklon.
Gin-seguro man sang presidente nga apisar sa worst-case scenario, makahatag ang gobyerno sang suporta sa mga kritikal nga sektor.
Ginpahayag sang presidente nga husto ang supply sang krudo sa pungsod, apang importante nga mas timprano ang paghanda agud masustiner ang energy security, price stability, kag fiscal sustainability sang pungsod.
