BACOLOD CITY — Smooth sailing na ang Oplan Byaheng Ayos, Undas 2017 sang Philippine Coast Guard.
Suno kay Lt. Senior Grade Jimmy Oliver Vingno, commander sang Coast Guard Station Bacolod, halin pa sang nagligad nga Biyernes ang pagdinaguso sang mga pasahero sa mga pwerto sa palibot sang Negros Occidental apang ila ginalauman nga mas magadamo ini sini nga adlaw tubtob bwas.
Sa karun suno kay Vingno, tuman man kadamo sang mga salakyan nga ginasakay sa mga ro-ro vessels.
Gin-activate na ang mga passenger assistance center kag magapabilin nga yara sa heightened alert status ang PCG tubtob sa Noviembre 6.
Ginpasiguro naman ni Vingno nga ang tanan nga pwerto sa probinsiya ang may yara gid sang mga PCG personnel.
Bangud sang bulyada sang mga pasahero, nagdugang na sang byahe sa ruta sang Pulupandan-Guimaras samtang subong nga adlaw ginalauman man ang pagdugang sang mga trips sa Cadiz-Bantayan kag Victorias-Ajuy.
Sa tunga sang kasakuon, ginapahanumdom sang PCG nga ginadumilian gid ang overloading sang mga barko.
Samtang, indi lamang sa dalanon ang pagpangdakop sang mga colurom nga salakyan kundi mangin sa kalalawran bangud nga suno kay Vingno, nagapanga-dakop man sila sang mga motorized banca nga colorum kag wala sang permit gikan sa MARINA.
