Naka-heightened alert na ang Coast Guard Station Northern Negros Occidental bilang kabahin sang ila preparasyon para sa byahe kag aktibidad sa Semana Santa.
Sa interview sang Bombo Radyo kay Lt Junior Grade Richelito Arbis, Assistant Station Commander sang Coast Guard Northern Negros Occidental, ginpahayag sini nga wala sang day-off ang ila mga personnel agud masiguro ang seguridad kag kaluwasan sang publiko, labi na sa mga pantalan kag beach resorts nga ginapaabot nga pagadagsaon sang mga tawo.
Suno kay Arbis, kabahin sang ila “Oplan Semana Santa 2026” ang pagpatuman sang mas hugot nga inspeksyon sa mga barko kag pantalan.
Suno diri, may dugang nga personnel ang iga-deploy sa mga ports, lakip na ang K9 units kag mga inspectors agud mas mapabakod ang seguridad.
Dugang pa, may ara man sang QR code system nga ginapapilit sa barko agud madasig lang ma-report sang mga pasahero ang bisan ano nga concern paagi sa pag-scan sini.
Dugang pa ni Arbis, may “Malasakit Help Desk” sa mga pantalan agud magbulig sa mga nagabiyahe kag makaresponde gilayon sa mga emergency nga sitwasyon.
Ginapanawagan sini ang publiko nga magkooperar agud mapabilin nga malinong kag mahilway ang pagselebrar sang semana santa.
