Gin-ako sang Philippine Drug Enforcement Agency (PDEA)-Negros Occidental nga nabudlayan sila nga i-trace kun sa diin naga-agi ang suplay sang iligal nga druga sa probinsiya.
Sa interview sang Bombo Radyo Bacolod kay PDEA-Negros provincial officer Nicholas Gomez, ginpahayag sini nga may yara sang diversionary tactics nga ginahimo ang mga drug personalities agud hilway nila nga mapasulod sa probinsiya ang iligal nga druga.
Suno kay Gomez, ginpabaskog pa nila sa karon ang ila nga intelligence gathering kag intelligence operations agud nga mabantayan nila sang husto ang mga illegal drug courier.
Dugang pa sini nga nagabulig man sa PDEA ang Philippine Coast Guard, Philippine National Police kag mga maritime groups agud nga mahibaluan kun sa diin naga-agi ang iligal nga druga.
Nagalaom naman ini nga malikawan na nga mangin transhipment point sang illegal drugs ang Negros Occidental.
