Ginpahayag sang Philippine Drug Enforcement Agency (PDEA) Negros Island Region nga legal ang ila pagserbe sang warrant of arrest sa isa ka drug group leader sa Sitio Napulangan 2, Brgy Jonob-jonob, Escalante City nga nagresulta sa engwkentro kag pagkapatay sang tatlo ka High Value Individual kalakip na ang subject person.
Ang mga napatay amo sanday Joseph Moso Bindoy nga ginakabig nga drug group leader; kag Piolo Morning Regodos, residente sang brgy Malasibog; kag Roy Bagayo Manija Jr., residente sang brgy Jonob-Jonob, Escalante City.
Apang may isa nga nasamaran nga gindala sa ospital kag yara sa karun sa hospital arrest.
Sa interview sang Bombo Radyo Bacolod kay Jan Keith Capili, investigation agent sang PDEA NIR, legal ang ila pagserbe sang warrant of arrest sang Miyerkules sang hapon apang may yara sang nagpalupok batok sa law enforcement units, amo nga nagdepensa man ang mga operatiba.
Napatay si Bindoy sa engkwentro samtang sa pagpatigayon sang clearing sa area, nasapwan ang duha ka bangkay nanday Regodos kag Manija.
Suno kay Capili padayon pa ang ila imbestigasyon kun ano ang koneksyon sang duha sa ginakabig nga drug lord bangod wala man sila sang mga pangalan sa listahan sang PDEA.
Pahayag sini, si Bindoy ang madugay na nga subject sa drug buybust operation apang nakapalagyo kag amo pa lamang sang naggwa ang warrant of arrest batok sa iya.
