Boredom kag curiosity ang nagtulod sa 3rd year college student para mag-imbento sang Pencroscope.
Sa interview sang Bombo Radyo Bacolod kay Ceejay Faala, tumandok sang Barangay Bagroy, Binalbagan, Negros Occidental kag estudyante sang Carlos Hilado Memorial State University (CHMSU)- Binalbagan Campus, bangod nga wala sang klase sang Agosto kag bored ini, siya ang nag-invent sang isa sa pinakagamay nga microscope indi lamang sa probinsya apang posible pa nga sa bug-os nga Pilipinas sa tion nga ma-patent na ang invention sini.
Suno sa Bachelor of Secondary Education major in Science student, una sini nga ginhimo ang research kag 3D model kag sa sulod lamang sang isa ka adlaw, natapos sini invent ang pen-sized digital microscope.
Ini ang human sa recycled materials gikan sa scrapped electrical devices kag mas barato sangsa typical microscope.
Mahimo man ini nga maconnect sa cellphone kag TV agud nga mapakita sa tanan pinaagi sa WIFI kag ini ang rechargeable pa.
Aminado man ini nga wala nangin mahapos ang paghuman sang pencroscope bangod nga mabudlay isulod ang mga materials sa gamay nga butang.
Dako naman ang pagpasalamat ni Faala sa CHMSU kasubong man kay 5th District Congressman Dino Yulo nga nagabaulig sa iya nga mapatent ang iya invention.
Mensahe sini, mas maayo kun may kuryosidad ang isa ka tawo nga amo nga makaduso sa iya sa paghimo sang solusyon sa mga problema sa palibot sini.
Dugang pa sini, dapat nga kilalahon sang tawo ang iya kaugalingon kag magsalig nga madamo pa ini sang mahimo kag mabulig sa kalibutan.
