BACOLOD CITY — Ginpasidunggan ang Philippine Drug Enforcement Agency (PDEA) Negros Island Region bangud sang maayo nga performance sini sa kampanya kontra iligal nga druga humalin sang bulan sang Enero tubtob Hunyo sini nga tuig.
Sa personal nga pagkari ni PDEA Director General Isidro Lapeña sa opisina sang PDEA-NIR sa ciudad sang Bacolod gin panginbulahan sini ang regional director nga si Atty. Roselyn Borja kadungan sang paghatag sang Natatanging Paglilingkod Award bangud sang madinalag-on nga mga operasyon kag pagkakumpiskar sang mga druga.
Base sa accomplishment reports nga gin presentar ni Agent Thess Albano, 39 ka high value target (HVT) drug personalities na ang naaresto nga kalabanan mga wanted samtang 121 naman ang kabug-usan sang drug personalities nga naaresto ukon 253 percent ini nga achievement sang ahensiya.
Duha ka high impact operations kag 40 ka anti-illegal drug operations ang napatigayon sa Negros Occidental samtang 35 naman ka HVT kag 93 ka drug personalities ang sa Negros Oriental nga may yara sang isa ka high impact operation, 33 ka total operations ang natigayon, 4 ka HVT kag 39 ka drug personalities ang nadakpan.
Nagdangat sa 111.2444 grams sang shabu (methamphetamine hydrochloride) nga balor P667,466.4, kag 6.675 grams sang marijuana balor P333,750 ang nakumpiskar sang PDEA-NIR sa Negros Occidental samtang 1,154,9024 grams sang shabu nga balor P6,929, 414.40 naman sa Negros Oriental.
Pila lamang ini sa mga nangin accomplishments sang ahensiya humalin sang Enero tubtob Hunyo 2017.
Kag agud personal nga makita ang gina tawag nga supply route kun sa diin naga-agi ang mga druga nga gina pasulod sa rehiyon 18 nagsakay sa RO-RO vessel si Lapeña pakadto sa Bacolod gikan sa rehiyon sang region 4-A kag 4-B.
Suno sa director gereneral, ang mga ruta sang RORO ang mahapos nga gina-agyan sang suplay sang druga gani plano sini nga butangan ini sang sea port interjection task group nga amo ang magabantay diri.