Ginahakot na ang mga perishable goods nga napabay-an kag nagkaladunot kasunod sang pagkasunog sang SM Hypermarket sa Barangay Handumanan, Bacolod City.
Nahibaluan nga tuman kabaho ang hangin nga nagahalin sa SM Hypermarket nga nasunog sang Hunyo 12 gani nagkahangawa ang mga residente sa epekto sini sa ila ikaayong-lawas.
Sa pagpakig-angot sang Bombo Radyo kay Punong Barangay Ricardo Danoy Biyernes sang udto, ginkumpirmar sini nga nasuguran na kahapon ang paghakot sa mga perishable goods.
Tinalikdan nga adlaw, gintiltig ang nalikod nga bahin sang hypermarket agud magtuon sa meat section kag mahapos lang ang pagkalkal sang backhoe.
Sa pagpangusisa ni Danoy sa mga residente, aminado ang mga ini nga indi na tuman kabaho ang nagadapya nga hangin kun ipaanggid kahapon.
Padayon sa karon ang paglimpyo sa hypermarket agud maubos hakot ang mga perishable goods nga nagkaladunot.
