Gin-aprubahan na sang Philippine National Police ang request sa suspension sang Permit to Carry Firearms Outside of Residence (PTCFOR) sang mga nagapanag-iya sang firearms sa ciudad sang Bacolod para sa 30th Panaad sa Negros Festival.
Sa interview sang Bombo Radyo Bacolod kay Police Lt Col Joem Malong, spokesperson sang Police Regional Office – Negros Island Region, ang suspension sang permit maga-umpisa alas- 12:01 sang kaagahon sa Abril 13 kag magalawig tubtob alas- 11:59 sang gab-i sa Abril 19.
Suno diri, ginalauman nga linibo ka mga tawo ang magalagaw kag magabisita para sa event amo nga nagakaangay lamang nga isuspend ang PTCFOR.
Apang, gin-athag sini nga otorisado nga magdala sang firearms ang mga miyembro sang PNP, Armed Forces of the Philippines kag Law Enforcement Agencies nga nagaperform sang ila duty.
Pahanumdom sini sa mga may armas luthang nga indi pagdal-on ang ila firearms bisan pa nga may permit to carry.
Nagpanugyan man ini sa mga residente kag magabisita nga magulu-aligmat para matigayon nga mangin malinong ang pagselebrar sang 30th Panaad sa Negros Festival.
