Ginpanginwala sang gin-aresto nga si Marcial de los Santos sang ciudad sang Iloilo nga iya ang suspected shabu nga nakumpiskar sa iya nga possession sa Roro Passenger Terminal sa BREDCO Port sa Barangay 10, Bacolod City, kahapon sang hapon.
Si de los Santos, 50-anyos, residente sang Zone 2, Caingin, Jaro, Iloilo City kag isa ka person with disability ang nakuhaan sang kapin 150 grams nga suspected shabu nga nagabalor sang P1,020,000.
Sa interview sang Bombo Radyo kay de los Santos, Martes ini nag-abot sa Bacolod agud magbisita sa iya pamilya sa Barangay Tangub kag magapauli na ini sa Iloilo kahapon.
Antes nagpauli, magahapit kuntani ini sa iya nga abyan sa Banago apang wala man ini sa ila nga balay.
Sang nagkadto ini sa supermart sa Banago agud nga magbakal sang tubig, may isa ka lalaki nga nagpamangkot sa iya kun san-o ini mapauli sa Iloilo.
Sang nahibaluan sang lalaki nga kahapon ini magapauli sa Iloilo, may ginpadala ini sa iya nga medyas nga iya man ginbaton.
Suno kay De Los Santos, ginkuha sang lalaki ang iya nga contact number agud nga mapadal-an ini sang text message kun nakaabot na sa Iloilo.// Apang nagpanugyan ang lalaki nga indi niya pagbukaron ang medyas samtang yara sa barko.
Ginpasundan man ini sang isa ka tawo nga amo ang magatuytoy sa iya papauli kag may matawag lang sa iya pag-abot sa Iloilo.
Apang pagsulod sa BREDCO Port, ginrikisa ini sang isa ka security guard kag didto na siya nakuhaan sang shabu.
Pagbalikid ni De Los Santos, wala na sa iya likod ang iya kaupod.
Ginlaragway sini ang lalaki nga moreno kag mabukod ang lawas.
