Nagapati ang personnel sang Public Order and Safety Office sang Bacolod nga bag-o lang nabun-ag ang fetus nga ginbilin sa kumon ukon katilingban sang Bacolod North Public Cemetery sa Burgos Street kahapon sang hapon.
Sa interview sang Bombo Radyo sa POSO guard nga si Jo Jenny Aller, nagsulod ang babayi alas-3:27 kahapon sang hapon.
May dala ang babayi nga eco-bag nga may balunan nga plastic.
Suno kay Aller, wala na nila gintsekyar ang dala sang babayi nga nasulod sa eco-bag bangud ila gindumdom nga ini ang pagkaon nga igahalad sa ila minatay.
Nagpadulong ang babayi sa kumon kag nagsindi sang kandila kag makaligad ang 30 minutos, naggwa na ini sa sementeryo apang wala na ini sang ginabitbit.
Natalupangdan sini nga maluya ang babayi kag mahinay ang iya sabat sang ginpamangkot ini kun tapos na ang tuyo gani ginsunod nila ini pagwa sa sementeryo.
Bangud nagaduda kun ano ang dala sang babayo, ginkadtuan nanday Aller ang kumon apang wala man sila sang may nakit-an nga balunan.
Makaligad ang pila ka minutos, naglabay ang utility personnel nga amo ang nag-usisa kun sa diin ginbilin sang babayi ang balunan.
Sang ulihi, ila nakit-an ang balunan nga ginbutang sa naibabaw nga bahin sang katilingban ukon kumon.
Suno sa POSO guard, wala pa nautod ang pusod sang fetus nga nagabarikutot sa sulod sang balunan gani ginapatihan nga bag-o lang ini bun-ag.
Ila naman ginabanta nga indi magnubo tatlo ka oras pa lang ginbun-ag ang bata.
Natalupangdan naman nga ginbutangan ang alcohol ang fetus.
Ang babayi ang huben pa, nagasuksok sang dilargo kag nakajacket.
Sang natukiban nga fetus ang iya ginbilin, ginsunod pa nila ang babayi apang wala na ini naabutan.
Gilayon nga nagreport sa Bacolod Police Station 4 sanday Aller nga nagpahibalo sa mga barangay officials kag nagtawag man sang pari nga amo ang nagmisa sa fetus antes ini ginlubong kahapon sang hapon.
Sa pagtsekyar sa log book sang POSO guard, LOVELY ang ngalan sang babayi apang indi mabasahan ang iya apelyido.
