BACOLOD CITY – Ginapaandaman sang hanay sang militar ang mga kabataan batok sa mga nagapang-recruit nga magsulod sa New People’s Army sa isla sang Negros.
Ini ang kadungan sang kumpirmasyon ni Brigadier General Francisco Delfin, commander sang 303rd Infantry Brigade sang Philippine Army, nga nagapadayon ang pag-recruit sang NPA sang ila mangin bag-o nga miyembro.
Suno kay Delfin, madamo nga paagi ang ginagamit sang NPA agud nga makarecruit.
Ang yara sa rural areas suno sa iya ang ginapahog sang rebelde nga grupo agud nga mapilitan nga magsulod sa ila hubon.
Magluwas diri, ginatarget sang NPA ang mga kabataan nga naga-istar sa urban areas kun sa diin ila ini nga ginakumbinsi nga magsandig sa ila ideyolohiya kag pagpakalain sa gobyerno agud mahaylo nga magsulod sa rebelde nga grupo.
Suno kay Delfin, ginapuntariya sang komunista ang mga kabataan nga naga-eskwela kag subong man ang mga out of school youth.
Ginalakip man sang NPA bisan ang mga menor de edad sa Negros Island sa pagpati nga madali lang ini mapapati sang ila ideyolohiya.
Bangud sini, nagpanugyan si Delfin nga indi gid magpalansi sa mga pasalig sang rebelde.
