Gin-banatan sang commander sang 303rd Infantry Brigade ang pahayag kag ang gin-padala nga sulat sang national commander sang Task Force Kasanag sa chief of staff sang Armed Forces of the Philippines.
Sa interview sang Bombo Radyo Bacolod kay Brigadier General Benedict Arevalo, gin-kadlawan sini ang pag-padala sang sulat ni Task Force Kasanag Commander John Chong sa ila chief of staff sa diin gin-pahayag ni Chong nga luyag sini maathagan kun ngaa nadugayan ang pag-responder sang mga suldado sa pag-ambush sa convoy ni Vice Mayor Ella Celestina Garcia-Yulo sadtong nakaligad nga Huwebes nga adlaw sa banwa sang Moises Padilla rason nga dako ini nga pag-panghakat kay Arevalo.
Ginpahayag naman sang Heneral nga yara na naka-standby ang tropa sa lugar agud maka-responder apang ang natabo nga ambush sa Moises Padilla suno sa iya ang isa ka reyalidad kag indi isa ka teleserye nga kun ara na ang bida, insigida nga makasulod gilayon sa eksena kag mapatay sini ang mga kontra.
Gin-katingala man ni Arevalo kun ngaa subong lang nag-reak si Chong sa ulihi nila nga pag-responder sa ambush bangud sadtong bulan sang Marso sang ginsulod sang mga rebelde ang puluy-an ni Moises Padilla Councilor Jolomar Hilario kag ini ang gin-patay, naulihi man ang ila pagresponder apang wala naman naka-reak ang national commander.
Wala man nagaka-lingkang si Arevalo kun ini ang tikang ni Chong agud baylohan siya bilang commander sang 303rd Infantry Brigade sa Negros Occidental bangud indi na bag-o para sa iya nga ginasaylo-saylo siya sang lugar.
