Nagpaandam ang pinuno sang Coast Guard Station Negros Occidental sa may plano nga magtabok sa mga border sang Iloilo kag Negros Occidental nga ginsirado bangud kun madakpan, manabat ang mga ini sa layi.
Sa interview sang Bombo Radyo Bacolod kay Commander Jansen Benjamin, ginpahayag sini nga indi dapat magplano nga mag-arkila sang bangka agud magtabok halin sa banwa sang Pulupandan padulong sa Guimaras kag Victorias patabok sa Ajuy bangud ginsarado na ang sea border sang probinsya sang Negros Occidental.
Ini ang kabahin sang precautionary measures sang probinsya agud malikawan ang pagsulod sang coronavirus 2019 (COVID-19) disease.
Suno kay Benjamin, aktibo sila nga magabantay kag manabat sa layi ang bisan sin-o nga madakpan nga nagbayolar sa ginpagwa nga Executive Order sang probinsya.
