BACOLOD CITY — Nagapanugyan ang Provincial Health Office sang Negros Occidental nga indi magmato-mato sa pagbulong sang sore eyes.
Nahibaluan nga naga-uso ang sore eyes subong nga tion sang tig-ilinit ukon summer season.
Suno kay Provincial Health Officer Dr. Ernell Tumimbang, ang nagasufrer sang amo nga kondisyon ang indi basta-basta nga magbakal sang eye drops nga wala sang prescription halin sa doktor.
Mas maayo pa gani suno kay Tumimbang nga manghilam-os nalang sang tubig ilabi na kun aga kun sa diin nagakipot ang mata.
Likawan man suno sa Health Officer ang pagpatulo sang gatas sang iloy sa mata bangud indi ini ang husto nga paagi sang pagbulong kag mangin tunaan lang sang dugang nga infection.
Gin-athag man sini nga wala nagalaton ang sore eyes pinaagi sa pagtulukay kundi dapat nga mahikap sang isa ka persona ang iya nga mata sang kamot nga may bacteria nga nagatuga sang amo nga kondisyon.
Subong nga summer season, nagauso man ang skin diseases kag diarrhea amo gani nga dapat maghalong suno sa iya ang mga pumuluyo.
Nagpanugyan man ini nga likawan ang pagpati-al sa init humalin las 10:00 sa aga tubtub las 2:00 sa hapon bangud makatuga sang skin disease ang tuman nga pagtinir sa idalom sang init.
Dapat man nga mag-inom sang bastante nga kadamuon sang tubig agud indi madehydrate.
